Pleidleisiwch dros Draphont Ddŵr Pontcysyllte, sydd wedi’i henwebu fel Safle Treftadaeth y Flwyddyn yng Ngwobrau Countryfile 2015-16 y BBC

Golygfa’n dangos Traphont Ddŵr Pontcysyllte a chwch camlas yn ei chroesi, NPRN: 34410   DI2010_1390.

Mae Traphont Ddŵr Pontcysyllte, canolbwynt mawreddog i un o Safleoedd Treftadaeth Byd UNESCO, ynghyd ag 11 filltir o’i chamlas ac adeiladweithiau cysylltiedig, yn ymgeisydd teilwng ar gyfer Safle Treftadaeth y Flwyddyn yng Ngwobrau Countryfile y BBC eleni. Cafodd ei chynllunio gan William Jessop a Thomas Telford, dau o’r dynion mwyaf nodedig yn hanes peirianneg sifil, ac fe’i hadeiladwyd rhwng 1795 a 1805 ar gost o £47,018 i fynd â Chamlas Llangollen (Ellesmere) dros Afon Dyfrdwy i’r de o Fasn Trefor.

Gan fanteisio ar dechnolegau newydd megis haearn bwrw, roedd Traphont Ddŵr Pontcysyllte yn adeiladwaith enfawr hynod o arloesol, ac athrylith cynllun Jessop a Telford sydd wedi sicrhau ei pharhad a’i lle mewn hanes. Mae deunaw colofn daprog o gerrig yn cario cafn cul o blatiau haearn am bellter o 307m. Dim ond 25mm sydd rhwng y dŵr y tu mewn a’r aer y tu allan i’r platiau metel. Mae pellter o 38.4m o lefel y dŵr yn y gamlas hyd at yr afon islaw. Am 200 mlynedd Pontcysyllte oedd y draphont ddŵr dalaf yn y byd ar gyfer cario cychod. Dim ond yn yr unfed ganrif ar hugain, yng Ngwlad Belg a China, y codwyd rhai uwch ar gyfer lifftiau cychod.

Llun o’r awyr yn dangos rhychwantau canolog syfrdanol Traphont Ddŵr Pontcysyllte, NPRN: 34410   AP_2006_0914.

Dyfarnwyd statws Treftadaeth Byd UNESCO i’r draphont ddŵr yn 2009, gan ei gosod ochr yn ochr â safleoedd eiconig fel y Grand Canyon, y Pyramidiau, Wal Fawr China a Thŵr Llundain. Adroddir ei hanes gan gyn Ysgrifennydd y Comisiwn Brenhinol yn ein cyd-gyhoeddiad diweddar, Pontcysyllte Aqueduct and Canal: World Heritage Site, y gellir ei brynu gan y Comisiwn Brenhinol am £9.99 yn unig (postio a phacio am ddim).

Y dyddiad cau ar gyfer pleidleisio yw 31 Ionawr 2016:
http://www.countryfile.com/awards2015-16





Tanysgrifiwch i Newyddion Treftadaeth Cymru a chofrestrwch ar gyfer yr RSS porthiant llawn: cliciwch y botwm RSS hwn a thanysgrifiwch!

---

Rhannu ar:
• Twitter   •   Facebook   • Google+   • Linkedin

---

Rydym hefyd ar gael ar:


Twitter Hashtag: #RCAHMWales