Awyrluniwch yr Awyren yn y Gelli Gandryll!

Y cynnyrch gorffenedig: awyren wedi’i hawyrlunio!

 Mewn heulwen braf, ymunodd y Comisiwn Brenhinol â chyrff treftadaeth eraill ar stondin Hanes Cymru yn y Gelli Gandryll eleni, lle cafodd gweithgareddau plant eu cynnal bob dydd. Roedd cyfraniad gwreiddiol y Comisiwn Brenhinol - Awyrluniwch yr Awyren! - yn llwyddiant ysgubol, gan roi cyfle i bawb ddarganfod treftadaeth gyfoethog Cymru o’r awyr drwy ddefnyddio casgliad y Comisiwn Brenhinol o awyrluniau (sydd i gyd ar gael ar Coflein), pot mawr o lud ac awyren bedair troedfedd o hyd! Drwy gydol Dydd Sadwrn, bu ymwelwyr â’r stondin yn brysur yn torri allan ac yn gludio mwy na 700 o ddelweddau i orchuddio’r awyren bren ac roedd y canlyniad  terfynol yn hynod drawiadol.

Bydd gan Robert, arth o ysgol gynradd yn Llundain, lawer i’w ddweud ar ôl mynd adref ar ôl hanner tymor!

Tanysgrifiwch i Newyddion Treftadaeth Cymru a chofrestrwch ar gyfer yr RSS porthiant llawn: cliciwch y botwm RSS hwn a thanysgrifiwch!

Rydym hefyd ar gael ar:
Twitter Hashtag: #RCAHMWales

Gweledigaethau o Le: Hanes Cofnodi Aneddiadau Cynlluniedig, 18 Ebrill - 4 Mai

Bydd arddangosfa o’r enw Gweledigaethau o Le: Hanes Cofnodi Aneddiadau Cynlluniedig gan Gomisiwn Brenhinol Henebion Cymru yn cael ei chynnal yng Nghanolfan y Celfyddydau, Aberystwyth, 18 Ebrill – 4 Mai, fel rhan o’r Ŵyl Bensaernïaeth Cymru gyntaf erioed. Bydd yr arddangosfa hon yn ymdrin â Mudiad y Gardd-Bentref, Tai Parod Casnewydd, Herbert North: Pensaer Celfyddyd a Chrefft, John Nash a’r Pictiwrésg, ac Eco-dai ac fe’i hategir gan ddelweddau hardd o Gofnod Henebion Cenedlaethol Cymru, y mae llawer ohonynt ar gael am ddim ar Coflein.

Nod yr Ŵyl newydd hon yw symbylu trafodaeth am bensaernïaeth. Bydd yr Ŵyl yn darparu fforwm ar gyfer penseiri, cynllunwyr a gweithwyr proffesiynol eraill, a’r cyhoedd, i rannu eu barn a’u gwybodaeth am yr amgylchedd adeiledig mewn rhaglen eang ei chwmpas o sgyrsiau, ffilmiau, gweithdai ac arddangosfeydd. Dau o uchafbwyntiau’r Ŵyl fydd gweithdy cerameg bensaernïol deuddydd gyda Gwen Heeney, a noson o bensaernïaeth a barddoniaeth gyda’r Bardd Llawryfog, Carol Ann Duffy a Bardd Cenedlaethol Cymru, Gillian Clarke. Gan ymestyn dros gyfnod o chwe wythnos, mae’n siŵr y bydd yr Ŵyl hon – y gyntaf o’i bath yng Nghymru – yn ysgogi trafodaeth am rôl arbennig pensaernïaeth yng Nghymru, ac yn cynnig rhywbeth i bawb.

 I gael manylion pellach, cysylltwch â Chanolfan y Celfyddydau, Aberystwyth.

Subscribe to the Heritage of Wales News and sign up for the full feed RSS, just click this RSS button and subscribe!

Also find us on:
Twitter Hashtag: #RCAHMWales