Darganfyddwch Darddiad Afon Wysg ar Daith Gerdded Fawr Gymreig y Comisiwn Brenhinol, 9 Mai 2015

Cymylau isel yn y mynyddoedd lle mae tarddiad Afon Wysg.

Yn dilyn llwyddiant taith gerdded y llynedd o Fan Llia i Fan Dringarth a arweiniwyd gan y Comisiwn Brenhinol fel rhan o Daith Gerdded Fawr Gymreig Cerddwyr Cymru, a gynhelir bob blwyddyn drwy gydol mis Mai, mae taith gyffrous arall wedi’i threfnu ar gyfer eleni mewn partneriaeth â Cadw a Cherddwyr Cymru. Ar Ddydd Sadwrn, 9 Mai bydd ein huwch archaeolegydd David Leighton yn arwain taith gerdded ddiddorol a difyr ar hyd rhannau uchaf Afon Wysg mor bell â’i tharddiad (o dan glogwyni Fan Brycheiniog a Bannau Sir Gaer), ac ochr ddwyreiniol bellaf y Mynydd Du. Bydd y daith gerdded gylchol hon, 11 km o hyd, yn cychwyn o’r ardal parcio a phicnic ym Mhont ar Wysg yn SN82002715. Yna byddwn yn dringo’n araf i 2000 o droedfeddi uwchlaw lefel y môr ac yn gweld amrywiaeth o safleoedd o’r cyfnodau cynhanesyddol, Rhufeinig, canoloesol a diweddarach. Ar hyd y daith fe welwn olygfeydd syfrdanol o Barc Cenedlaethol Bannau Brycheiniog, carneddau claddu o’r Oes Efydd, olion gwersyll cyrch Rhufeinig a hyd yn oed gorlan ddefaid fawr o’r bedwaredd ganrif ar bymtheg gyda’i hadrannau niferus. Yng nghwmni staff eraill y Comisiwn Brenhinol, gan gynnwys yr hanesydd pensaernïol Richard Suggett, bydd David Leighton yn cynnig ei arbenigedd hanesyddol ar hyd y ffordd, gan rannu’r cyfoeth o wybodaeth sydd ganddo am ardaloedd uwchdirol ar ôl treulio blynyddoedd lawer yn cydlynu Prosiect Uwchdiroedd llwyddiannus y Comisiwn Brenhinol. Mae’n argoeli bod yn ddiwrnod gwych allan i gerddwyr brwd o bob oedran a chyfle prin i ddarganfod mwy am yr hanes sydd o’n cwmpas ym mhob man!

Mae lleoedd ar gyfer y daith yn dal ar gael, er nad oes llawer ar ôl. I gael manylion pellach ac i drefnu’ch lle cysylltwch â nicola.roberts@cbhc.gov.uk.

Fel rhan o ddathliadau pen-blwydd y Cerddwyr yn 80 oed, bydd y Daith Gerdded Fawr Gymreig eleni yn fwy nag erioed! I gael mwy o fanylion, ewch i’w gwefan yn http://www.ramblers.org.uk/go-walking/big-welsh-walk.aspx.

I weld rhestr o’r teithiau cerdded treftadaeth sy’n cael eu trefnu gan Cadw, ewch i’r dudalen ddigwyddiadau ar eu gwefan: http://cadw.wales.gov.uk/events/?lang=en.

Merlod a chylch meini yn Nyffryn Wysg uchaf: un o’r safleoedd ar y daith.

Tanysgrifiwch i Newyddion Treftadaeth Cymru a chofrestrwch ar gyfer yr RSS porthiant llawn: cliciwch y botwm RSS hwn a thanysgrifiwch!

Rydym hefyd ar gael ar:


Twitter Hashtag: #RCAHMWales