Defnyddio Papurau Newydd Wedi’u Digido I Gynyddu Ein Gwybodaeth Am Y Gorffennol

Yng nghynhadledd Gorffennol Digidol y Comisiwn Brenhinol yr wythnos ddiwethaf, rhoddodd Dr Stephen Briggs sgwrs wybodus ar ‘Defnyddio Papurau Newydd wedi’u Digido i Atgyfnerthu’r Cofnod Archaeolegol’. Tynnodd sylw at y ffaith fod nifer enfawr o bapurau newydd wedi cael eu digido yn ystod y degawd diwethaf. Dechreuodd Dr Briggs ddefnyddio’r adnodd hwn wrth ymchwilio i archaeoleg ac archaeolegwyr y bedwaredd ganrif ar bymtheg. Daeth i sylweddoli y gallai papurau newydd ddarparu llawer iawn o wybodaeth allweddol am archaeoleg a hanes. Mae hyn yn cynnwys hanesion cyfoes am ddarganfod arteffactau a safleoedd, a hyd yn oed ddisgrifiadau o gloddiadau cynnar nad ydynt wedi’u cofnodi yn unman arall. Ar hyn o bryd mae Dr Briggs yn chwilio am bartneriaid i helpu i gopïo a chyhoeddi gwybodaeth am tua 1400 o gelciau arian bath o’r Oesoedd Canol ymlaen na wyddom amdanynt, a disgrifiadau o fwy na 450 o gladdfeydd o’r Oes Efydd gynnar yn yr Alban, y mae’r mwyafrif ohonynt yn anhysbys i ni.

Dr Briggs yn pwyntio at ddelwedd o 1817 yn dangos cynllun o safle claddu o’r Oes Efydd yn Crichie, Fife.

Daeth yn amlwg yn ystod sgwrs Dr Briggs fod hen bapurau newydd yn cynnwys toreth o wybodaeth unigryw, a bod papurau newydd wedi’u digido yn adnodd gwerthfawr ond wedi’i esgeuluso i’r sawl sy’n gwneud ymchwil archaeolegol a hanesyddol. Mae mwy a mwy o bapurau newydd o wahanol ffynonellau, gan gynnwys Archif Papurau Newydd Prydain a Llyfrgell Genedlaethol Cymru, yn cael eu digido a’u rhoi ar-lein.

Tanysgrifiwch i Newyddion Treftadaeth Cymru a chofrestrwch ar gyfer yr RSS porthiant llawn: cliciwch y botwm RSS hwn a thanysgrifiwch!

Rydym hefyd ar gael ar:
Twitter Hashtag: #RCAHMWales