Mae’r Sgwadron Gwlanog yn Dychwelyd!

Aelod o’r Sgwadron Gwlanog yn ymweld â Chastell Conwy, NPRN: 121

Bydd prosiect Prydain oddi Fry yn cynnal ymgyrch Gwau dros Brydain oddi Fry arall fel rhan o Ddiwrnod Byd-Eang Gwau’n Gyhoeddus a hoffem i chi gymryd rhan.

Mae gwefan Prydain oddi Fry yn gartref i gasgliad unigryw o ryw 70,000 o awyrluniau a dynnwyd ar hyd a lled gwledydd Prydain rhwng 1919 a 1953 gan gwmni Aerofilms Ltd. Mae’n rhoi cyfle i bawb ymchwilio a rhannu eu gwybodaeth a’u hatgofion am y lleoedd sydd i’w gweld yn y ffotograffau.

Mae rhai o’r lluniau ar y wefan yn fwy na 90 mlwydd oed a dangosant sut mae tirweddau a threfi wedi newid yn aruthrol dros y blynyddoedd. Mae’r prosiect Gwau dros Brydain oddi Fry yn rhoi cyfle i chi arddangos eich sgiliau crefft a hefyd i ddarganfod mwy am eich ardal leol a sut y newidiodd yn ystod yr ugeinfed ganrif.

Ffotograff Aerofilms o 1923. Gellir dod o hyd i’r ddelwedd ar wefan Prydain oddi Fry

Mae’n hawdd cymryd rhan.

Cam 1. Ewch ati i wau eich awyren. Defnyddiwch ein patrwm ni neu eich patrwm eich hun. Rhowch rwydd hynt i’ch dychymyg ...

Cam 2. Ewch i http://www.britainfromabove.org.uk/cy i ddod o hyd i luniau o’ch ardal chi a dewiswch hoff leoliad. Manteisiwch ar ddiwrnod heulog ac ewch yno gyda’ch awyren i dynnu ffotograff. Os dymunwch, gadewch eich campwaith i bobl eraill ei fwynhau.

Cam 3. Llwythwch eich llun i fyny i’n grŵp Gwau dros Brydain Oddi Fry yn http://www.britainfromabove.org.uk/cy/groups/knit-britain-above i ymuno â rhengoedd eich cyd ‘edafeddhedwyr’.

Cewch hyd yn oed ddod i’r digwyddiad gwau byw di-dâl yn Amgueddfa Wlân Cymru, Dre-fach Felindre, ger Castellnewydd Emlyn, Sir Gâr ar Ddydd Sadwrn 14 Mehefin, 11am-3pm!

Cafodd awyrennau gwau y llynedd eu gweld mewn lleoliadau ar draws Cymru, gan gynnwys Bangor, Caernarfon a Chasnewydd - gallwch weld beth wnaeth y gweuwyr yma: http://www.britainfromabove.org.uk/cy/groups/knit-britain-above

Ble bydd y sgwadron gwlanog yn hedfan eleni?

Enghraifft o un o’r Sgwadron Gwlanog a gafodd ei gwau y llynedd.

Hogwch eich gweill a dirwynwch eich edafedd a byddwch yn barod i esgyn i’r awyr gyda Gwau dros Brydain oddi Fry!

Tanysgrifiwch i Newyddion Treftadaeth Cymru a chofrestrwch ar gyfer yr RSS porthiant llawn: cliciwch y botwm RSS hwn a thanysgrifiwch!

Rydym hefyd ar gael ar:
Twitter Hashtag: #RCAHMWales