Cyfleuster Chwilio Newydd Coflein

Bydd dimensiwn newydd i system cyrchu’r we y Comisiwn Brenhinol – Coflein – yn cael ei gyflwyno ar 11 Mehefin. Hyd yn hyn, mae ymchwilwyr wedi gallu chwilio ein cronfa ddata o safleoedd a henebion i ddarganfod y cofnodion archifol hynny yng Nghofnod Henebion Cenedlaethol Cymru sy’n ymwneud yn benodol â’r safleoedd mae chwiliad yn dod o hyd iddynt. Ond o 11 Mehefin, bydd defnyddwyr hefyd yn gallu chwilio catalog archifau Cofnod Henebion Cenedlaethol Cymru yn uniongyrchol. Bydd hyn yn caniatáu i’r cyhoedd archwilio ein casgliadau yn fwy manwl a chyrchu cyfeiriadau at gofnodion nad ydynt o anghenraid yn gysylltiedig â safleoedd penodol.

Bydd defnyddwyr yn gallu chwilio am gofnodion a gynhyrchwyd gan unigolion penodol, er enghraifft archaeolegydd neu hanesydd adnabyddus, neu gan wahanol gyrff. Bydd modd gwneud chwiliadau hefyd yn ôl dyddiad, yn ôl cyfrwng y cofnod, drwy ddisgrifiad testun-rhydd, neu drwy gyfuniadau o’r tri therm hyn. Yn ogystal, gall ymchwilwyr fynd yn syth at gasgliadau penodol a’u harchwilio drwy bori, neu drwy ddefnyddio’r paramedrau chwilio a amlinellwyd uchod. Bydd y canlyniadau’n arddangos y cofnodion yn ôl hierarchaeth y catalog (e.e. ar lefel y casgliad, y grŵp a’r eitem), gan alluogi defnyddwyr i ddeall cyd-destun y cofnodion o fewn eu casgliadau cysefin, a gweld y berthynas rhwng y gwahanol gofnodion.

Bydd nodweddion newydd hefyd yn ei gwneud hi’n bosibl i ddefnyddwyr fireinio eu chwiliadau drwy bennu meini prawf pellach, e.e. drwy ddewis cofnodion o gasgliadau penodol yn unig neu drwy gyfyngu chwiliadau i gofnodion sy’n cynnwys eitemau digidol ar-lein yn unig. Yn ogystal, bydd defnyddwyr yn gallu pennu pa lefel o gofnodion catalog y maent hwy am eu gweld, boed yn gasgliad, grŵp neu eitem. Bydd y gallu hwn i fireinio chwiliadau drwy bennu meini prawf pellach yn cael ei gymhwyso at gyfleusterau chwilio presennol y wefan yn ystod yr wythnosau i ddod.

Gellir dod o hyd i Coflein yma: http://www.coflein.gov.uk

Tanysgrifiwch i Newyddion Treftadaeth Cymru a chofrestrwch ar gyfer yr RSS porthiant llawn: cliciwch y botwm RSS hwn a thanysgrifiwch!

Rydym hefyd ar gael ar:
Twitter Hashtag: #RCAHMWales